इन्द्रायणी प्राविधिक बिद्यालयलाई उत्कृष्ट बिद्यालयका रुपमा बिकास गरिने

पञ्चकन्या गाउँपालिका अध्यक्ष तेज बहादुर तामाङ (रमेश) ले इन्द्रायणी प्राविधिक बिद्यालयलाई जिल्लाकै उत्कृष्ट बिद्यालयका रुपमा बिकास गरिने बताउनु भएको छ ।

बिद्यालयको ३५ औं वार्षिकोत्सबको अवसरमा शुभकामना मन्तव्य राख्दै अध्यक्ष तामाङले उक्त कुरा बताउनु भएको हो । बिद्यालयले उत्कृष्ट नतिजा हालिस गरेकोमा खुसी ब्यक्त गर्दै अन्य बिद्यालयले समेत अनुसरण गर्नुपर्नेमा जोड दिनुभयो । बिद्यालयमा टाढाबाट आउने बिद्यार्थीलाई आवासका लागि छात्रावास भवन निर्माण गर्नुका साथै बिद्यालयमा स्टाफ नर्सको दरबन्दी ब्यबस्थापन गर्ने प्रतिबद्धता जनाउनु भयो ।

त्यसैगरी गाउँपालिका उपाध्यक्ष बिमला पाठकले शुभकामना मन्तव्य राख्नुहुँदै गैरसरकारी संघ संस्था परिचालन गर्दा आबश्यकताका आधारमा परिचालन गरिएको र त्यस क्रममा यसै बिद्यालयलाई प्राथमिकतामा दिएर विभिन्न संस्था परिचालन गरि शैक्षिक गुणस्तर कायम गर्न गाउँपालिका लागि परेको बताउनु भयो ।

वडा अध्यक्ष महानन्द ढकालले आफ्नो कार्यकालमा नमुना बिद्यालयको रुपमा बिकास गर्न आफुले सक्दो मेहनत गर्ने बताउनु भयो ।

बिद्यालयका प्रधानाध्यापक कुमार पाठकले बिद्यालयलाई अहिलेको स्थानमा पुर्याउन पालिकाको महत्त्वपूर्ण सहयोग प्राप्त भएको बताउनु भयो, पालिकाको सहयोगमा च्याउ घर निर्माण, टनेल निर्माण गरिएको बताउनु भयो । बिद्यालयलाई कृषी अनुसन्धान केन्द्रको रुपमा अगाडी बढाउने योजना रहेको बताउनु भयो ।

प्राबिधिक धार तर्फ बाली बिज्ञान पढाइ हुने यस बिद्यालयमा ९ देखि १२ कक्षाका बिद्यार्थीहरुले सिक्दै र सिकाउँदै परियोजना अन्तर्गत पाँचवटा टनेलमा व्यावसायिक तरकारी तथा फुल खेती गर्दै आएको छ । वार्षिकोत्सबको अबसरमा गत शैक्षिकसत्रमा उत्कृष्ट अंक ल्याउने बिद्यार्थीहरुलाइ पुरस्कार प्रदान गरिएको थियो ।

तसैगरी समाजसेवी भगवान पौडेल र अच्युत खतिवडाले स्थापना गर्नुभएको अक्षय कोषबाट ९ जना बिद्यार्थीलाइ छात्रवृत्ति प्रदान गरिएको थियो । ब्यबस्थापन समितिका अध्यक्ष उत्तम पाठकको अध्यतामा कार्यक्रम सम्पन्न भएको थियो ।