म रावण हूँ
म रावण हूँ
मभित्र रावण छ
हामीभित्र रावण छ
शनै शनै रावणमय हुँदैछ समय
हुँदैछ जयजयकार रावणपथको।
म रावण हूँ
मेरा दश भ्रामक शिरहरु
कामका, क्रोधका हुन्,
लोभका, मोहका हुन्
यी टाउकाहरु
शक्ति दुरुपयोगका हुन्
दम्भ, घमण्ड र अहंकारका हुन्
म रावण बोकेर बाँचिरहेको समय हुँ
म रावण बोकेर नाचिरहेको सत्ता हुँ।
‘ओम् मम शत्रुन विदारय विदारय विदारय
मारय मारय काटय काटय हुं फट् स्वाहा।’
हा~ हा ~~ हा~~~ हा
म रावण हुँ
म धर्मको जप गर्छु र अधर्मको साम्राज्य हाँक्छु
म सत्यको तप गर्छु र मायावी रथ हाँक्छु
म रावण हुँ
क्रोध र हठको खानी
भ्रम र कोलाहलको प्रिय
चित्कार र क्रन्दनमा अट्टहास हाँस्ने।
म असुरहरुका सुर हुँ
खलनायकहरुका नायक
अंशमा म रावण हुँ
समग्रतामा म रावण हुँ
थितिलाई बेथितिको जालोमा बाँध्नसक्ने
रीतिलाई कुरीतिले कज्याउनसक्ने
म त्यो साधना हुँ
म त्यो मन्त्र हुँ
खासमा म रावणतन्त्र हुँ।
‘ओम् क्लीं श्रीं श्रीं मम धनं देही फट् स्वाहा’
हा~ हा ~~हा ~~~हा
युग युग बाँचिरहेको
म त्यही लोभको लंका हुँ
म त्यही भयको डंका हुँ
म त्यही रावण हुँ
जहाँ न्याय ‘ओम ह्रिं क्लिं फट् स्वाहा’ हुन्छ र अन्याय जित्छ
जहाँ सत्य ‘ओम ह्रिं क्लिं फट् स्वाहा’ हुन्छ र झुठ जित्छ
इमानको साधना गरेर बेइमानको पहाड चड्ने
चरित्रको चित्र बनाएर ब्यभिचारको कुण्ड खोल्ने
सात्विकबाट तामसतिर लम्किरहेको
म त्यही रावण हुँ।
….
म त्यही रावण हुँ
सय वर्षअघि म राणा थिएँ
सत्तरी वर्षअघि प्रजातन्त्र भएँ
पचास वर्षअघि म पञ्चे थिए
पच्चिस वर्षअघि बहुदले भएँ
ब्यवस्थैपिच्छे ताण्डव नाँच्ने
म त्यही रावण हुँ
…
आज पनि म रावण हुँ
माक्स मेरा शिवजी हुन्
लेनिन मेरा ब्रम्हा
स्टालीन र माओ
मेरा विष्णु र इन्द्र हुन्
गणतन्त्रको यो दुईतिहाइ
मेरो अमृतघडा हो
हु हा हा हा
म रावण हुँ
‘ओम ह्रिं क्लिं फट् स्वाहा’
….
यो दशैं मेरो तिथि होइन
तिम्रा रामलाई सोध
म त्यही रावण हुँ
यत्र तत्र सर्वत्र
हु हा हा हा हा।
प्रतिक्रिया दिनुहोस्