वृद्धभत्ता लिन गएका ९५ वर्षीय सेते सार्की मृतावस्थामा भेटिए

नुवाकोटको विदुर नगरपालिका–३ को वडा कार्यालयमा बुधबार वृद्धभत्ता लिन गएका स्थानीय ९५ वर्षीय सेते सार्की मृतावस्थामा भेटिएका छन् । वृद्धभत्ता लिन जान भनी घरबाट निस्किएका सार्की घर नआएपछि परिवारले जिल्ला प्रहरी कार्यालयमा खोजतलासका लागि खबर गरेका थिए ।

प्रहरी, स्थानीयवासी र सार्कीका परिवार सहितका टोलीले खोज्ने क्रममा  बारीको पाटामा उनी मृतावस्थामा फेला परेको जिल्ला प्रहरी कार्यालय नुवाकोटका प्रहरी निरीक्षक विष्णुहरि फुयाँलले बताउनुभयो । प्रहरी निरीक्षक फुयाँलका अनुसार शवपरीक्षणका लागि त्रिशूली अस्पतालमा पठाई घटनाको थप अनुसन्धान भइरहेको छ ।