ENPHO CWAST BSF Biostand Water Filter TWS Nuwakot Trishuli

नारायण नेपाल

तपाईंलाई कस्तो लाग्छ कमरेड
गाउँ गाउँका सिंहदरबार
सहरभरिका लालदरबार
भोकको अलाप
रोदनका चित्कार
असन्तुष्टिको आगो
चोर बसेको चौतारो
साधु चढेको शूली
आँशु बगेको त्रिशुली
कमरेडको केही साइनो त पर्दैन ?
तपाईंलाई कस्तो लाग्छ कमरेड ?

जङ्गबहादुरको जङ्ग
महेन्द्रको पञ्चायत
विपिको समाजवाद
मदनको जनवाद
पुष्पकमलको प्रचण्डपथ
आजको गणतन्त्र
तपाईंलाई कस्तो लाग्छ कमरेड ?

लुई सोह्रौँको गिलेटिन
हिटलरको ग्याँस च्याम्बर
भैरवनाथको बधशाला
माओको चिङकाङसाङ
लेनिनको पेत्रोग्राद
चे ग्वेभाराको बोलेभिया
लेन्डुप दोर्जेको सिक्किम
दलाइ लामाको तिब्बत
कमरेडलाई कुन प्रिय लाग्छ कमरेड ?

चितामाथिको भोज
खरानीभित्रको आगो
गुम्सिएको जनमन
दबाइएको आवाज
तिम्रो सत्ता र आजादी गीतहरू
कुनै साइनो लाग्छ कि दुश्मनी
कुन प्रिय लाग्छ कमरेड ?

गरिबको आँशु
श्रमिकको पसिना
तिम्रो सम्वृद्धि
सत्ताको वैभव
कुन रसिलो
कुन स्वादिलो हुन्छ कमरेड ?
तपाईंलाई कुन प्रिय लाग्छ कमरेड ?

Nuwakot Fall Ceiling House and Decoration